Thad Jean သည် ၂၀၂၅ ခုနှစ် PFL welterweight grand prix ပြိုင်ပွဲတွင် ၄ လအတွင်း ၃ ပွဲဆက်တိုက် အနိုင်ရရှိကာ ဗိုလ်စွဲခဲ့ပြီး ကြီးစိုးနိုင်ခဲ့သည်။ သူ၏ အဓိကနည်းပြဖြစ်သူ Daniel Mendes ကမူ ယခုအောင်မြင်မှုသည် Jean ၏ အားကစားလောကတွင် အလွန်အောင်မြင်မည့် ကစားသမားဘဝ၏ အစပြုရုံသာရှိသေးသည်ဟု ယုံကြည်နေသည်

Daniel Mendes သည် ဝါရင့် MMA ကစားသမားဟောင်း Gesias Cavalcante နှင့်အတူ Fight Sports Deerfield Beach အသင်းကို ဦးဆောင်နေသူဖြစ်သည်။ သူသည် Jean နှင့် စတင်တွေ့ဆုံခဲ့ပုံမှာ စိတ်ဝင်စားစရာကောင်းလှသည်။ ၂၀၁၈ ခုနှစ် ဇူလိုင်လ၊ Jean ၏ အပျော်တမ်း (Amateur) ကစားသမားဘဝ နောက်ဆုံးရှုံးပွဲတွင် Mendes ၏ တပည့်ဖြစ်သူ Roman Faraldo နှင့် ယှဉ်ပြိုင်ခဲ့ရစဉ်က ဖြစ်သည်။

ယင်းနောက် ၁၆ လအကြာတွင် Jean သည် Mendes တို့အသင်းမှ အခြားကစားသမားတစ်ဦးဖြစ်သူ Jorge Molina နှင့် ထပ်မံယှဉ်ပြိုင်ခဲ့ပြီး ဒိုင်ဆုံးဖြတ်ချက်ဖြင့် အနိုင်ရရှိခဲ့သည်။

ထိုပွဲပြီးနောက်တွင် Mendes နှင့် Cavalcante တို့က Jean ကို သူတို့အသင်း၏ အဖွဲ့ဝင်အဖြစ် ပါဝင်ရန် ဖိတ်ခေါ်ခဲ့ကြပြီး COVID-19 ကပ်ရောဂါကာလအတွင်းမှာပင် “The Silverback” ဟု အမည်ပြောင်ရထားသည့် Jean ကို ပရော်ဖက်ရှင်နယ်ပွဲဦးထွက်အတွက် စတင်လေ့ကျင့်ပေးခဲ့ကြသည်။ ၄ နှစ်တာကာလအတွင်း လျင်မြန်စွာတိုးတက်လာခဲ့ပြီးနောက် ယခုအခါ Jean သည် ပရော်ဖက်ရှင်နယ်ပွဲပေါင်း ၁၁ ပွဲကစား၊ ၁၁ ပွဲလုံးအနိုင် (၁၁-၀) ဟူသော စံချိန်ကောင်းကို ပိုင်ဆိုင်ထားပြီး PFL ပြိုင်ပွဲကြီးအောက်တွင် ၇ ပွဲဆက်တိုက် အနိုင်ရရှိထားသူ ဖြစ်လာခဲ့သည်။