လက်ဝှေ့လောကရဲ့ ပြဿနာကလေး (The Problem Child) လို့ လူသိများတဲ့ ဂျိတ်ပေါလ်က WBA lightweight ချန်ပီယံ ဂါဗွန်တာ “Tank” ဒေးဗစ်နဲ့ ထိုးဖို့ စီစဉ်ထားတာ အဆင်မပြေဖြစ်နေပြန်ပြီ။ ဒီပွဲကို နိုဝင်ဘာ ၁၄ ရက်နေ့မှာ အတ္တလန်တာမြို့က State Farm Arena မှာ ထိုးပြီး Netflix ကနေ တိုက်ရိုက်ပြမယ်လို့ ကြော်ငြာထားပေမယ့် အခုထိတော့ အတည်မဖြစ်သေးဘူးလို့ USA Today က ဗုဒ္ဓဟူးနေ့မှာ သတင်းထုတ်ပြန်ခဲ့ပါတယ်။
ပြဿနာရဲ့ အရင်းခံကတော့ လက်ဝှေ့သမားနှစ်ဦးရဲ့ ကိုယ်အလေးချိန် ကွာခြားမှုကြောင့်ပါပဲ။ ဂျိတ်ပေါလ်က ပြီးခဲ့တဲ့ ဇွန်လတုန်းက Julio Cesar Chavez Jr. နဲ့ ထိုးခဲ့တုန်းက ၁၉၉.၄ ပေါင် ရှိခဲ့ပြီး Tank ဒေးဗစ်ကတော့ ၁၄၀ ပေါင်ထက် ပိုခဲ့ဖူးခြင်း မရှိပါဘူး။ ဒါကြောင့် ဂျော်ဂျီယာ အားကစားနဲ့ ဖျော်ဖြေရေးကော်မရှင် (GAEC) က ဒီပွဲကို တရားဝင် အတည်ပြုပေးဖို့ တွန့်ဆုတ်နေတာပါ။
GAEC ဥက္ကဋ္ဌ Rick Thompson က MVP အဖွဲ့ဟာ မကြော်ငြာသင့်သေးတဲ့အရာကို ကြော်ငြာနေတယ်လို့ ဝေဖန်ခဲ့ပါတယ်။ အဲဒီပွဲအတွက် ခွင့်ပြုမိန့်နဲ့ စည်းမျဉ်းလျှော့ပေါ့ပေးဖို့ MVP က တောင်းဆိုထားတာကို GAEC အဖွဲ့ရဲ့ အစည်းအဝေး အစီအစဉ်ကနေပါ ဖယ်လိုက်ပြီလို့ သိရပါတယ်။ Thompson က ကိုယ်အလေးချိန် အရမ်းကွာတဲ့သူတွေကို ယှဉ်ပြိုင်ခွင့်ပြုမယ့် စည်းမျဉ်းပြင်ဆင်တာကို သူအနေနဲ့ ဆန့်ကျင်ကြောင်းနဲ့ ကော်မရှင်ကလည်း ခွင့်ပြုပေးမှာ မဟုတ်ကြောင်း ပြောပါတယ်။
ဂျိတ်ပေါလ် ဒါမှမဟုတ် MVP ကတော့ နေရာပြောင်းရွှေ့နိုင်ခြေရှိတဲ့အပေါ် ထုတ်ပြန်ပြောဆိုတာမျိုး မရှိသေးပါဘူး။ ဗုဒ္ဓဟူးနေ့မှာ နယူးယောက်နဲ့ ကြာသပတေးနေ့မှာ အတ္တလန်တာမှာ လုပ်ဖို့ စီစဉ်ထားတဲ့ သတင်းစာရှင်းလင်းပွဲတွေကိုလည်း ဖျက်သိမ်းလိုက်ပြီး ပထမဆုံး သတင်းစာရှင်းလင်းပွဲကို တနင်္လာနေ့မှာ နယူးယောက်မှာပဲ ပြန်လုပ်မယ်လို့ MVP က ကြေညာခဲ့ပါတယ်။ ဒါကြောင့် ဒီပွဲက ဘယ်နေရာမှာ ဘယ်လို ဆက်ဖြစ်မလဲဆိုတာ စောင့်ကြည့်ရဦးမှာပါ။
