အက်ကီတီကီရဲ့အောင်ပွဲခံပုံကို မိုက်မဲတဲ့လုပ်ရပ်လို့ အာနယ်ဆလော့ ပြစ်တင်
လီဗာပူးလ်နည်းပြ အာနယ်ဆလော့က ဆောက်သမ်တန်နဲ့ပွဲမှာ နှစ်ဝါတစ်နီနဲ့ ထုတ်ပယ်ခံခဲ့ရတဲ့ တိုက်စစ်မှူး အက်ကီတီကီရဲ့ အောင်ပွဲခံပုံကို မိုက်မဲတဲ့လုပ်ရပ်လို့ ပြစ်တင်ပြောကြားခဲ့ပါတယ်။
အက်ကီတီကီဟာ အဲဒီပွဲမှာ ဒုတိယပိုင်းရောက်မှ လူစားဝင်ကစားခဲ့ရပြီး ပွဲချိန်(၈၅)မိနစ်မှာ အသင်းအတွက် အနိုင်ဂိုးသွင်းယူပြီးတဲ့နောက် အကျင်္ီချွတ်ပြီး အောင်ပွဲခံခဲ့တာကြောင့် ဒုတိယအဝါကတ် ပြသခံခဲ့ရတာဖြစ်ပါတယ်။
”ပထမတစ်ခုက မလိုအပ်တဲ့လုပ်ရပ်ကြောင့်ဖြစ်ပြီး ဒုတိယတစ်ခုကတော့ မိုက်မဲတဲ့လုပ်ရပ်ပါ။ တစ်ဖက်နောက်ခံလူက ဘာမှလုပ်မရအောင် တားဆီးထားနိုင်ချိန်မှာ No.9 တစ်ယောက်အတွက် ဘယ်လောက်ခက်ခဲလဲဆိုတာ ကျွန်တော် နားလည်ပါတယ်။ ဒီလိုအနေအထားမှာ စိတ်ခံစားမှုကို ထိန်းချုပ်နိုင်ဖို့ လိုပါတယ်။ ချန်ပီယံလိဂ်ဗိုလ်လုပွဲမှာ ဂိုးသွင်းနိုင်တာဆိုရင်တော့ သူ ဒီလိုလုပ်တာကို ကျွန်တော် နားလည်ပေးနိုင်ပါတယ်” လို့ အာနယ်ဆလော့က ပြောကြားခဲ့ပါတယ်။
အက်ကီတီကီဟာ တစ်ပွဲပယ်ပြစ်ဒဏ် ချမှတ်ခံခဲ့ရတာကြောင့် ခရစ္စတယ်ပဲလေ့စ်နဲ့ ယှဉ်ပြိုင်ရမယ့် ပရီးမီးယားလိဂ်ပွဲကို ပွဲပယ်ခံရမှာ ဖြစ်ပါတယ်။
ဆောက်သမ်တန်ကို (၂-၁)ဂိုးနဲ့ အနိုင်ရတဲ့ပွဲမှာ အက်ကီတီကီ ထုတ်ပယ်ခံခဲ့ရပေမဲ့ တိုက်စစ်မှူး အီဆက်ခ်က လီဗာပူးလ်ကစားသမားဘဝ ပထမဆုံးဂိုး သွင်းယူနိုင်ခဲ့ပါတယ်။
