၂၀၂၅- ၂၀၂၆ ရာသီ ထိုင်းလိဂ်-၂ ပြိုင်ပွဲမှာ မြန်မာ့လက်ရွေးစင်ကစားသမားများဖြစ်တဲ့ တိုက်စစ်မှူးသန်းပိုင်ရဲ့ ထရတ်အသင်းက ကွင်းလယ်လူ လွင်မိုးအောင်ရဲ့ မဟာဆာရာခမ်အသင်းကို အိမ်ကွင်းမှာ အနိုင်ရရှိခဲ့ကြောင်း သိရပါတယ်။
ယခုရာသီ ထိုင်းလိဂ်-၂ ပြိုင်ပွဲ ပွဲစဉ်(၃၁) ကို ပြီးခဲ့တဲ့မတ် ၂၀၊ ၂၁၊ ၂၂ ရက်များက ကျင်းပခဲ့ပြီး မြန်မာ့လက်ရွေးစင် တိုက်စစ်မှူးသန်းပိုင်ရဲ့ ထရတ်အသင်းဟာ မတ် ၂၂ ရက်က အိမ်ကွင်းမှာ လွင်မိုးအောင်ရဲ့ မဟာဆာရာခမ်အသင်းနဲ့ ယှဉ်ပြိုင်ကစားခဲ့ရာ (၂-ဝ) ဂိုးနဲ့ အနိုင်ရရှိခဲ့ပါတယ်။
အဲဒီပွဲမှာ ထရတ်အသင်းက နိုင်ပွဲရရှိခဲ့ပေမဲ့ တိုက်စစ်မှူး သန်းပိုင်ကို ပွဲပြီးခါနီးမှသာ ထည့်သွင်းအသုံးပြုခဲ့ကြောင်း သိရပါတယ်။
သန်းပိုင်ဟာ ပွဲပြီးခါနီးမှ ဝင်ရောက်ကစားခွင့်ရခဲ့တာကြောင့် ထရတ်အသင်းအတွက် ဂိုးသွင်းယူပေးနိုင်ခြင်းမရှိပေမဲ့ ယခုရာသီမှာ ထရတ်အသင်းအတွက် ခုနစ်ဂိုး သွင်းယူပေးထားကြောင်း သိရပါတယ်။
ကွင်းလယ်လူ လွင်မိုးအောင်ကတော့ အဲဒီပွဲမှာ မ ဟာဆာရာခမ်အသင်းရဲ့ ပွဲထွက်ကစားသမား အဖြစ် ပွဲချိန်ပြည့် ပါဝင်ကစားခွင့်ရခဲ့ပြီး အသင်းက ရှုံးပွဲကြုံတွေ့ခဲ့ခြင်းဖြစ်ပါတယ်။
လွင်မိုးအောင်ဟာ ယခုရာသီမှာ မဟာဆာရာခမ်အသင်းအတွက် ခုနစ်ဂိုး သွင်းယူပေးထားကြောင်း သိရပါတယ်။
