ပါလ်မာကို နှစ်ပတ်ကနေ သုံးပတ်အထိ အနားပေးသွားမယ်လို့ မာရက်စကာ ပြောကြား
ချယ်လ်ဆီးနည်းပြ မာရက်စကာက အင်္ဂလန်တိုက်စစ်ကစားသမား ကိုးလ်ပါလ်မာကို နှစ်ပတ်ကနေ သုံးပတ်အထိ အနားပေးသွားမယ်လို့ ပြောကြားခဲ့ပါတယ်။
ပါလ်မာဟာ လက်ရှိအချိန်မှာ ပေါင်ခြံဒဏ်ရာရရှိနေပြီး ပိုမိုဆိုးရွားမသွားစေဖို့နဲ့ အောက်တိုဘာလ နိုင်ငံတကာရက်သတ္တပတ်အလွန်မှာ ကြံ့ခိုင်မှုအပြည့်နဲ့ ကစားနိုင်ဖို့အတွက် မာရက်စကာက အခုလိုဆုံးဖြတ်လိုက်ခြင်းဖြစ်ကြောင်း သိရပါတယ်။
”ကိုးလ်ရဲ့ဒဏ်ရာ ပိုဆိုးရွားမသွားအောင် နည်းနည်းလောက်ကာကွယ်ပေးဖို့ ကျွန်တော်တို့ ဆုံးဖြတ်လိုက်တာပါ။ သူ့ကို ရာနှုန်းပြည့်ကြံ့ခိုင်မှုနဲ့ ပြန်တွေ့ရဖို့ နိုင်ငံတကာရက်သတ္တပတ်မတိုင်ခင် နှစ်ပတ်ကနေ သုံးပတ်အထိ အနားပေးသွားမှာပါ” လို့ မာရက်စကာက ပြောကြားခဲ့ပါတယ်။
ဒါကြောင့် ပါလ်မာအနေနဲ့ လာမယ့် ဘရိုက်တန်နဲ့ပွဲမှာ ပါဝင်နိုင်မှာမဟုတ်သလို၊ ဘင်ဖီကာနဲ့ ချန်ပီယံလိဂ်ပွဲ၊ လီဗာပူးလ်နဲ့ ပရီးမီးယားလိဂ်ပွဲတွေကိုလည်း လွဲချော်ရမယ်လို့ သိရပါတယ်။
ချယ်လ်ဆီးအသင်းဟာ လက်ရှိအချိန်မှာ ဒဏ်ရာရကစားသမားတွေ များပြားနေပြီး ဘရိုက်တန်နဲ့ပွဲကို လွဲချော်မယ့် ကစားသမား(၁၀)ယောက်လောက် ရှိနေတယ်လို့ သိရပါတယ်။
