မန်စီးတီးအသင်းရဲ့ ကွင်းလယ်ကစားသမား ဖီးလ်ဖိုဒန်နဲ့ နည်းပြ ဂွါဒီယိုလာတို့က မန်ချက်စတာဒါဘီနိုင်ပွဲကို နာမည်ကျော် ဗြိတိန်လက်ဝှေ့သမား ရစ်ကီဟက်တန်အတွက် ရည်ညွှန်းကြောင်း ပြောကြားခဲ့ပါတယ်။
ဗြိတိန်နိုင်ငံရဲ့ အကျော်ကြားဆုံးလက်ဝှေ့သမားတွေထဲက တစ်ဦးအဖြစ် သတ်မှတ်ခံထားရတဲ့ ရစ်ကီဟက်တန်ဟာ မန်ချက်စတာဒါဘီပွဲ ကစားခဲ့တဲ့ စက်တင်ဘာ(၁၄)ရက်မှာပဲ သူ့နေအိမ်မှာ သေဆုံးနေတာကို အိမ်နီးချင်းရဲ့အကြောင်းကြားမှုနဲ့ ရဲတပ်ဖွဲ့က တွေ့ရှိခဲ့ရတာပါ။
ကွယ်လွန်ချိန်မှာ အသက်(၄၆)နှစ်သာရှိသေးတဲ့ ရစ်ကီဟက်တန်က မန်စီးတီးအသင်းကိုအားပေးတဲ့ ပရိသတ်တစ်ဦးဖြစ်တာကြောင့် မန်ချက်စတာဒါဘီပွဲ မစမခင် တစ်မိနစ်ငြိမ်သက်ပြီးတော့လည်း ဝမ်းနည်းကြောင်း ပြသခဲ့ကြပါတယ်။
”ဒီပွဲမှာ သူက ကျွန်တော့်ကို အပိုလှုံ့ဆော်မှုပေးခဲ့ပါတယ်။ ဒီနိုင်ပွဲက သူ၊ သူ့မိသားစုနဲ့ သူ့ကြောင့် နာကျင်ခံစားနေရတဲ့ သူတွေအတွက်ပါ။ ဒီပွဲမှာ သူ ကျွန်တော်တို့ကို အားပေးနေမှာလည်း သေချာပါတယ်” လို့ ဖိုဒန်က ပြောကြားခဲ့ပါတယ်။
ဂွါဒီယိုလာကလည်း ”ကျွန်တော် ဒီမှာ (၁၀)နှစ်ရှိပြီ ဖြစ်တာကြောင့် ငြိမ်သက်ခဲ့ရတဲ့ မိနစ်တွေလည်း အများကြီးပါပဲ။ ဒါပေမဲ့ ဒီနေ့လောက် ဝမ်းနည်းစရာ ကောင်းတာကို ကျွန်တော် မမှတ်မိပါဘူး။ သူ့ကို ဂုဏ်ပြုပေးခဲ့ကြတဲ့ မန်ယူနိုက်တက်ပရိသတ်တွေကိုလည်း ကျေးဇူးအများကြီးတင်ပါတယ်။ သူက မန်စီးတီးအသင်းရဲ့ အကြီးစားပရိသတ်တစ်ယောက်ဖြစ်ပြီး သူ့မိသားစုအတွက် ကျွန်တော် အရမ်းဝမ်းနည်းမိပါတယ်” လို့ ပြောကြားခဲ့ပါတယ်။
