PSG အသင်းရဲ့ နည်းပြ အန်နရီကေးက ကလပ်ကမ္ဘာ့ဖလားဗိုလ်လုပွဲအပြီးမှာ ဖြစ်ပွားခဲ့တဲ့ ရန်ပွဲအတွင်း ပြိုင်ဘက်ကစားသမားကို တိုက်ခိုက်ခြင်းမဟုတ်ဘဲ ဝင်ရောက်ဖျန်ဖြေခြင်းသာဖြစ်တယ်လို့ ဖြေရှင်းချက်ပေးခဲ့ပါတယ်။
ချယ်လ်ဆီးအသင်းက ၃-၀ ဂိုးနဲ့ အနိုင်ရရှိခဲ့တဲ့ ၂၀၂၅ ကလပ်ကမ္ဘာ့ဖလားဗိုလ်လုပွဲမှာ ပွဲပြီးခါနီးမှာ အားပြိုင်မှုက ပိုမိုပြင်းထန်လာခဲ့ပါတယ်။
ပွဲချိန်(၈၅)မိနစ်မှာ ချယ်လ်ဆီးနောက်ခံလူ ကူကူရယ်လာရဲ့ ဆံပင်ကို ဆွဲခဲ့တာကြောင့် PSG ကွင်းလယ်ကစားသမား နယ်ဗက်စ် အနီကတ်ပြထုတ်ပယ်ခံခဲ့ရပါတယ်။
ပွဲပြီးချိန်မှာတော့ နှစ်ဖက်အသင်းကစားသမားတွေကြား အပြန်အလှန်တွန်းထိုးမှုတွေ ဖြစ်ပွားခဲ့ပြီး နည်းပြ အန်နရီကေးက ချယ်လ်ဆီးတိုက်စစ်ကစားသမား ဂျော်အိုပတ်ဒရိုကို တိုက်ခိုက်ခဲ့တယ်လို့ မီဒီယာတွေက ဖော်ပြခဲ့ပါတယ်။
ရုပ်သံမှတ်တမ်းတွေ၊ ဓာတ်ပုံမှတ်တမ်းတွေမှာလည်း အန်နရီကေးက ဂျော်အိုပတ်ဒရိုကို တွန်းထိုးခဲ့တာ မြင်တွေ့ရပါတယ်။
ဒါပေမဲ့ အန်နရီကေးက ပိုမိုဆိုးရွားတဲ့ ပြဿနာတွေ မဖြစ်ပွားအောင် ဝင်ရောက်ဖျန်ဖြေခဲ့ခြင်းသာဖြစ်တယ်လို့ ပြောကြားခဲ့ပါတယ်။
”ကျွန်တော့်ရဲ့ ရည်ရွယ်ချက်ကတော့ နောက်ထပ်ပြဿနာတွေ မဖြစ်ပွားအောင် ကစားသမားတွေကို လူစုခွဲဖို့ လုပ်ဆောင်တာပါ။ ဒါကြောင့် တွန်းထုတ်ရတာတွေ ရှိခဲ့တာပါ။ ဒီလိုမျိုး ဘယ်တော့မှ ထပ်မဖြစ်သင့်ဘူးလို့ ထင်ပါတယ်။ ထပ်ပြောရရင် ကျွန်တော့်ရည်ရွယ်ချက်က အခြေအနေပိုမဆိုးအောင် တားဆီးဖို့ပါ” လို့ ပြောကြားခဲ့ပါတယ်။
