မြန်မာ့ရိုးရာလက်ဝှေ့ဖိုက်တာတစ်ဦးဖြစ်တဲ့ မြလုံးချောဟာ လာမယ့်မေ (၃၀) ရက် (စနေ) မှာ ခွန်ခမာပြိုင်ပွဲအဖြစ် ကမ္ဘောဒီးယားဖိုက်တာ ထွန်းချာလီနဲ့ ယှဥ်ပြိုင်ထိုးသတ်မှာဖြစ်ပါတယ်။
Xtreme Cambodia Kun Khmer လို့အမည်ရတဲ့ ခွန်ခမာပြိုင်ပွဲကို လာမယ့်မေ (၃၀) ရက်မှာ ကမ္ဘောဒီးယားနိုင်ငံ ၊ ဖနွမ်းပင်မြို့ VIP Arena မှာ ကျင်းပပြုလုပ်မှာဖြစ်ပါတယ်။
ပြိုင်ပွဲမှာ တွဲဆိုင်း (၇) ဆိုင်း ပါဝင်မှာဖြစ်ပြီး မြန်မာဖိုက်တာ မြလုံးချောဟာ ခွန်ခမာ (၅၄) ကီလိုတန်းမှာ အိမ်ရှင်ကမ္ဘောဒီးယားဖိုက်တာ ထွန်းချာလီနဲ့ (၃) မိနစ် (၃) ချီ ထိုးသတ်ရမှာဖြစ်ပါတယ်။
မြလုံးချောဟာ မြန်မာ့ရိုးရာလက်ဝှေ့ ဒုတိယတန်းမှာ ပွဲပေါင်းများစွာထိုးသတ်နေသူဖြစ်ပြီး ယခုနောက်ပိုင်းမှာ ကမ္ဘောဒီးယားခွန်ခမာပြိုင်ပွဲတွေကို သွားရောက်ထိုးသတ်နေသူဖြစ်ပါတယ်။
မြလုံးချောဟာ ယခုလအတွင်း နောက်ဆုံးထိုးသတ်ခဲ့တဲ့ ခွန်ခမာပြိုင်ပွဲမှာ အိမ်ရှင်ကမ္ဘောဒီးယားဖိုက်တာကို အမှတ်နဲ့ အနိုင်ရထားပါတယ်။
