ခရစ္စတယ်ပဲလေ့စ်နဲ့ပွဲမှာ လီဗာပူးလ်အသင်းအတွက် ဂိုးသမား ဖရက်ဒီဝုဒ်မန်း ပွဲထွက်ခွင့်ရဖွယ်ရှိ
လီဗာပူးလ်အသင်းဟာ အင်္ဂလန်ဂိုးသမား ဖရက်ဒီဝုဒ်မန်းကို ဒီနေ့ည ခရစ္စတယ်ပဲလေ့စ်နဲ့ ယှဉ်ပြိုင်ကစားမယ့် လိဂ်ဖလားစတုတ္ထအဆင့်ပွဲမှာ ပွဲထွက်ခွင့်ပြုဖွယ်ရှိကြောင်း သိရပါတယ်။
အင်္ဂလန်အသင်းရဲ့ သက်တမ်းအလိုက် လူငယ်အသင်းအဆင့်ဆင့်မှာ ရွေးချယ်ခံခဲ့ရဖူးတဲ့ ဖရက်ဒီဝုဒ်မန်းဟာ ပြီးခဲ့တဲ့နွေရာသီမှာ ပရက်စတန်အသင်းနဲ့ စာချုပ်သက်တမ်းကုန်ဆုံးပြီး လီဗာပူးလ်အသင်းကို ပြောင်းရွှေ့ကြေးအလွတ်နဲ့ ရောက်လာခဲ့တာပါ။
လီဗာပူးလ်အသင်းဟာ လက်ရှိအချိန်မှာ ဘရာဇီးလ်ဂိုးသမား အယ်လစ်ဆန် ဒဏ်ရာရနေတာကြောင့် မာမာဒက်ရှ်ဗီလီကို အသုံးပြုနေရတဲ့အတွက် ပြည်တွင်းဖလားပွဲမှာ ဖရက်ဒီဝုဒ်မန်းကို အခွင့်အရေးပေးဖို့ စဉ်းစားနေခြင်းဖြစ်ကြောင်း သိရပါတယ်။
အသက်(၂၈)နှစ်ရှိပြီဖြစ်တဲ့ ဖရက်ဒီဝုဒ်မန်းဟာ လီဗာပူးလ်အသင်းအတွက် တစ်ပွဲမှ ကစားခွင့်မရသေးတဲ့အတွက် ဒါဟာ ပထမဆုံးပွဲထွက်မှု ဖြစ်လာဖွယ်ရှိကြောင်းလည်း သိရပါတယ်။
နယူးကာဆယ်အသင်းမှာတုန်းက ပရီးမီးယားလိဂ်ပွဲတချို့ ကစားခဲ့ဖူးတဲ့ ဖရက်ဒီဝုဒ်မန်းက ရာသီကြိုပွဲစဉ်ဖြစ်စေ၊ ပြိုင်ပွဲဖြစ်စေ လီဗာပူးလ်အသင်းအတွက် ကစားခွင့်ရချိန်မှာ အကောင်းဆုံးကြိုးစားသွားမှာဖြစ်ကြောင်း အသင်းနဲ့ စာချုပ်ချုပ်ဆိုချိန်မှာ ပြောကြားခဲ့ဖူးပါတယ်။
ဖရက်ဒီဝုဒ်မန်းဟာ ၂၀၁၇ ယူ-၂၀ ကမ္ဘာ့ဖလားပြိုင်ပွဲမှာ ရွှေလက်အိတ်ဆု ဆွတ်ခူးနိုင်ခဲ့သူဖြစ်ကြောင်းလည်း သိရပါတယ်။
