အာဆင်နယ်အသင်းနည်းပြ အာတေတာက ရုန်းကန်နေရတဲ့ တိုက်စစ်မှူး ယိုကယ်ရက်စ်ကို ထောက်ခံအားပေးမှု ပြုလုပ်ခဲ့ပါတယ်။
ယိုကယ်ရက်စ်(၂၇ နှစ်)အနေနဲ့ ဒုတိယရာသီဝက်မှာ နောက်ထပ်အဆင့်တစ်ခုကို ရောက်ရှိလိမ့်မယ်လို့ ခန့်မှန်းခဲ့ပါတယ်။
ယိုကယ်ရက်စ်ဟာ ပြီးခဲ့တဲ့နွေရာသီမှာ စပို့တင်းလစ္စဘွန်းအသင်းကနေ အာဆင်နယ်အသင်းထံ ယူရို ၇၃ သန်းနဲ့ ရောက်ရှိခဲ့တာပါ။
ဒါပေမဲ့ ပြိုင်ပွဲစုံ ၁၉ ပွဲကစားပြီးချိန်မှာ ခြောက်ဂိုးသာ သွင်းယူထားနိုင်လို့ ဝေဖန်မှုတွေ ခံနေရပါတယ်။
ပြီးခဲ့တဲ့ ဝုလ်ဗ်နဲ့ပွဲက သူ့ရဲ့ခြေစွမ်းကလည်း အများထောက်ပြစရာဖြစ်ခဲ့တယ်။
အာဆင်နယ်အနေနဲ့ ဘုန်းမောက်တိုက်စစ်ကစားသမား ဆယ်မန်ယိုကို ခေါ်ယူဖို့ ပစ်မှတ်ထားနေတယ်လို့လည်း သတင်းထွက်နေပါတယ်။
