မန်ယူအသင်းရဲ့နည်းပြ အာမိုရင်မ်က မိမိအနေနဲ့ မန်ယူအသင်းရဲ့ မန်နေဂျာသာဖြစ်ချင်ပြီး နည်းပြမဖြစ်ချင်ဘူးလို့ ပြောကြားခဲ့ပါတယ်။
မန်နေဂျာက ကစားသမားခေါ်ယူမှု၊ ရောင်းချမှုတွေကိုပါ စီမံခွင့်ရှိပြီး နည်းပြက စီမံခွင့်မရှိတာကြောင့် အာမိုရင်မ်က အခုလိုပြောကြားခဲ့ခြင်းဖြစ်ကြောင်း သိရပါတယ်။
”ကျွန်တော် ဒီအသင်းကို မန်နေဂျာအဖြစ် လုပ်ဆောင်ဖို့ လာခဲ့တာပါ။ နည်းပြအဖြစ် မဟုတ်ပါဘူး။ ဌာနတိုင်းမှာ ကင်းထောက်ဌာန၊ အားကစားဒါရိုက်တာတွေမှာ သူတို့အလုပ်ကို သူတို့လုပ်ဖို့ လိုအပ်ပါတယ်။ ကျွန်တော့်ရဲ့ စာချုပ် (၁၈)လအတွင်းမှာ မန်နေဂျာအဖြစ် ကျွန်တော် လုပ်ဆောင်သွားချင်ပါတယ်။ အသင်းမှာ အပြောင်းအလဲလုပ်ဖို့ လိုအပ်နေပါတယ်” လို့ အာမိုရင်မ်က ပြောကြားခဲ့ပါတယ်။
အာမိုရင်မ်က ခရစ္စမတ်ကာလတုန်းကလည်း သူ့ရဲ့ ၃-၄-၃ ကစားကွက်ကို အောင်မြင်အောင် ပုံမဖော်နိုင်တာက ငွေကုန်ကြေးကျများပြီး အချိန်ပေးရမှာဖြစ်တာကြောင့်လို့လည်း ပြောကြားခဲ့ဖူးပြီး အသင်းတာဝန်ရှိသူတွေရဲ့ ဆက်ဆံရေးအဆင်မပြေမှု ရှိလာကြောင်း သိရပါတယ်။
ဒါပေမဲ့ အာမိုရင်မ်က သူ့နေရာကို အစားဝင်မယ့်သူတစ်ယောက် ရောက်မလာမချင်း အသင်းက ထွက်သွားမှာမဟုတ်ဘူးလို့လည်း ဆိုခဲ့ပါတယ်။
”ကျွန်တော့်နာမည်က တူဟယ်လ်မဟုတ်ဘူး၊ ကွန်တီမဟုတ်ဘူး၊ မော်ရင်ဟိုမဟုတ်ဘူးဆိုတာလည်း သိပါတယ်။ ဒါပေမဲ့ ကျွန်တော်က မန်ယူအသင်းရဲ့ မန်နေဂျာပါ။ စာချုပ်(၁၈)လမှာ အဲဒီလိုမျိုး ကျွန်တော် လျှောက်လှမ်းသွားမှာပါ။ ဒါမှမဟုတ် ဘုတ်အဖွဲ့က အပြောင်းအလဲလုပ်ဖို့ ဆုံးဖြတ်တဲ့အထိပါ။ ကျွန်တော် နုတ်ထွက်မှာ မဟုတ်ပါဘူး။ ကျွန်တော့်နေရာကို အစားဝင်မယ့် တစ်ယောက်ယောက် ရောက်မလာမချင်း ကျွန်တော့်အလုပ်ကို ကျွန်တော် ဆက်လုပ်သွားမှာပါ” လို့ အာမိုရင်မ်က ပြောကြားခဲ့ပါတယ်။
