မန်စီးတီးနဲ့ ဘုန်းမောက်အသင်းတို့ဟာ ဆယ်မီညိုရဲ့အပြောင်းအရွှေ့အတွက် ဒီတစ်ပတ်အတွင်း ဆွေးနွေးမယ်လို့ သိရပါတယ်။
ဘုန်းမောက်အသင်းမှာ ခြေစွမ်းပြနေတဲ့ ဂါနာလက်ရွေးစင် တောင်ပံကစားသမား ဆယ်မီညိုကို ပရီးမီးယားလိဂ်ထိပ်သီးအသင်းများစွာက ခေါ်ယူဖို့ စိတ်ဝင်စားနေကြပြီး ဇန်နဝါရီမှာ အပြိုင်ကမ်းလှမ်းဖွယ်ရှိကြောင်း သတင်းထွက်နေပါတယ်။
ဆယ်မီညို(၂၅ နှစ်)ဟာ ဘုန်းမောက်အသင်းနဲ့ ၂၀၃၀ ခုနှစ်အထိ စာချုပ်ချုပ်ဆိုထားပေမဲ့ လာမယ့်ဇန်နဝါရီလမှာ ပေါင်(၆၅)သန်းနဲ့ ထွက်ခွာခွင့်ရရှိမယ့် လျော်ကြေးစာချုပ် ထည့်သွင်းချုပ်ဆိုထားကြောင်း သိရပါတယ်။
ဒါပေမဲ့ အဲဒီလျော်ကြေးစာချုပ်က ဇန်နဝါရီ(၁၀)ရက်အထိသာ အကျုံးဝင်မှာဖြစ်တာကြောင့် ခေါ်ယူလိုတဲ့အသင်းတွေအနေနဲ့ ဇန်နဝါရီ(၁)ရက်ကနေ (၁၀)ရက်အတွင်းသာ အဲဒီတန်ဖိုးနဲ့ ခေါ်ယူနိုင်မှာဖြစ်ကြောင်း သိရပါတယ်။
လက်ရှိအချိန်မှာ ဆယ်မီညိုကို ခေါ်ယူဖို့ မန်စီးတီးနဲ့အတူ မန်ယူ၊ လီဗာပူးလ်၊ စပါးနဲ့ ချယ်လ်ဆီးတို့ကလည်း စိတ်ဝင်စားနေပေမဲ့ ဆယ်မီညိုက မန်စီးတီးမှာ ပြောင်းရွှေ့ကစားလိုကြောင်း ဖွင့်ဟထားတာကြောင့် မန်စီးတီးအသင်းက ဇန်နဝါရီစျေးကွက်မဖွင့်ခင် ဘုန်းမောက်အသင်းနဲ့ ဆွေးနွေးခွင့်ရမှာဖြစ်ကြောင်း သိရပါတယ်။
ဘုန်းမောက်နည်းပြ အိုင်ရာအိုလာကတော့ အသင်းအတွက် အလွန်အရေးပါတဲ့ ဆယ်မီညိုကို အသင်းက ထွက်ခွာသွားစေလိုခြင်းမရှိဘူးလို့ ပြောကြားခဲ့ပါတယ်။
