မန်စီးတီးတိုက်စစ်မှူး ဟာလန်းက အသင်းရဲ့ ချန်ပီယံလိဂ်ရှုံးပွဲက ရှက်စရာကောင်းကြောင်း ဖွင့်ဟဝန်ခံခဲ့ပြီး အသင်းရဲ့ အတွေ့အကြုံရင့် ကစားသမားတွေနဲ့အတူ ရှုံးပွဲအတွက် တာဝန်ယူကြောင်း ပြောကြားခဲ့ပါတယ်။
မန်စီးတီးအသင်းဟာ မနေ့က ယှဉ်ပြိုင်ခဲ့တဲ့ ချန်ပီယံလိဂ်ပွဲစဉ်(၇)မှာ နော်ဝေကလပ် ဘိုဒယ်ဂလင့်အသင်းကို (၁-၃)ဂိုးနဲ့ ရှုံးနိမ့်ခဲ့တာဖြစ်ပြီး ကွင်းလယ်ကစားသမား ရိုဒရီ ထုတ်ပယ်မခံရခင်ကတည်းက အဲဒီရလဒ် ထွက်ပေါ်နေခဲ့တာပါ။
ဘိုဒယ်ဂလင့်အသင်းဟာ ချန်ပီယံလိဂ်အုပ်စုအဆင့်ကို ဒီရာသီမှာမှ ပထမဆုံးယှဉ်ပြိုင်ဖူးတဲ့အသင်းဖြစ်တာကြောင့် ရှက်စရာကောင်းတဲ့ ရှုံးပွဲဖြစ်ကြောင်း ဟာလန်းက ပြောကြားခဲ့ခြင်းလည်းဖြစ်ပါတယ်။
”ရိုဒရီ၊ ဒွန်နာရမ်မာ၊ ရိုင်ဒါစ် စတဲ့ အတွေ့အကြုံရင့်ကစားသမားတွေနဲ့အတူ ကျွန်တော် အပြည့်အဝတာဝန်ယူပါတယ်။ ကျွန်တော် ဘယ်သူ့ကိုမှ အပြစ်မတင်ချင်ပါဘူး။ ဒါပေမဲ့ ကျွန်တော်တို့က ပိုပြီးတာဝန်ယူဖို့ လိုအပ်ပါတယ်။ ဘာကြောင့်လဲဆိုတော့ ကျွန်တော်တို့ရဲ့စွမ်းဆောင်ရည်က လုံလောက်မှုမရှိလို့ပါ။ ကျွန်တော့်မှာ အဖြေတော့ မရှိပါဘူး။ ကျွန်တော် ဂိုးမသွင်းနိုင်ခဲ့တဲ့အတွက် အပြည့်အဝတာဝန်ယူပါတယ်။ မန်စီးတီးအသင်းရဲ့ ပရိသတ်တစ်ယောက်ချင်းစီကို တောင်းပန်ပါတယ်။ လိုက်ပါအားပေးခဲ့တဲ့ ပရိသတ်တိုင်းကိုလည်း တောင်းပန်ပါတယ်” လို့ ဟာလန်းက ပြောကြားခဲ့ပါတယ်။
မန်စီးတီးအသင်းဟာ ပြီးခဲ့တဲ့ မန်ချက်စတာဒါဘီမှာ ရှုံးပွဲမရှိမှတ်တမ်း ရပ်တန့်သွားခဲ့ပြီးနောက် ဒီရာသီမှာ တတိယအကြိမ်မြောက် နှစ်ပွဲဆက်ရှုံးနိမ့်မှုနဲ့ ရင်ဆိုင်ခဲ့ရခြင်းဖြစ်ကြောင်း သိရပါတယ်။
