ဆန်းတို့စ်အသင်းဟာ ဘရာဇီးလ်တိုက်စစ်မှူး နေမာကို ၂၀၂၆ ဒီဇင်ဘာ ၃၁ အထိ သက်တမ်းတိုးစာချုပ် ချုပ်ဆိုလိုက်ပြီဖြစ်ကြောင်း အတည်ပြုကြေညာခဲ့ပါတယ်။
နေမာဟာ အစောပိုင်းတုန်းက ကမ္ဘာ့ဖလားအခွင့်အရေးအတွက် ဥရောပကို ပြန်လည်ပြောင်းရွှေ့ကစားဖို့ ဆန္ဒရှိနေကြောင်း သတင်းထွက်ခဲ့ပေမဲ့ နောက်ဆုံးမှာတော့ ဆန်းတို့စ်အသင်းမှာသာ ဆက်ကစားဖို့ ဆုံးဖြတ်လိုက်တာဖြစ်ပါတယ်။
ဆန်းတို့စ်က နေမာရဲ့ ကစားသမားဘဝ အစပြုတဲ့ အသင်းဖြစ်ပြီး ၂၀၂၅ ဇန်နဝါရီမှာမှ အသင်းကို တစ်ကျော့ပြန်ရောက်ရှိခဲ့တာပါ။
လာမယ့် ဖေဖော်ဝါရီမှာ အသက်(၃၄)နှစ်ပြည့်မယ့် နေမာဟာ ပြီးခဲ့တဲ့ရာသီက ဒူးဒဏ်ရာရှိနေတဲ့ကြားက ခွဲစိတ်ကုသမှုပြုလုပ်ဖို့ကို ရွှေ့ဆိုင်းထားကာ ဆန်းတို့စ်အသင်း တန်းမဆင်းရအောင် ပါဝင်ကစားခဲ့သူဖြစ်ပါတယ်။
”ဆန်းတို့စ်က ကျွန်တော့်ရဲ့နေရာပါ။ ကျွန်တော် အိမ်မှာ ရှိနေတာပါ။ ခင်ဗျားတို့နဲ့အတူ ကျွန်တော့်ရဲ့ ပျောက်ဆုံးနေတဲ့ အိပ်မက်တွေကို ရယူသွားချင်ပါတယ်” လို့ နေမာက စာချုပ်သက်တမ်းတိုးတဲ့ ဗီဒီယိုမှာ ပြောကြားခဲ့ပါတယ်။
နေမာက ဘရာဇီးလ်လက်ရွေးစင်အသင်းနဲ့အတူ ၂၀၂၆ ကမ္ဘာ့ဖလားပြိုင်ပွဲမှာ ဆင်နွှဲခွင့်ရဖို့ မျှော်လင့်နေပြီး နည်းပြ အန်ဆယ်လော့တီကတော့ ကြံ့ခိုင်မှုပြည့်ဝဖို့ လိုအပ်ကြောင်း သတိပေးထားပါတယ်။
