ချယ်လ်ဆီး နှင့် PSG (မြန်မာစံတော်ချိန် တနင်္လာနံနက် ၁း၃၀ နာရီ)
ပုံစံအသစ်နဲ့ ပြောင်းလဲကျင်းပတဲ့ ကလပ်ကမ္ဘာ့ဖလားပြိုင်ပွဲမှာ ဥရောပကလပ်နှစ်သင်း ဗိုလ်လုပွဲအဖြစ် ယှဉ်ပြိုင်ရမှာပါ။ အစဉ်အလာပိုင်းကို ကြည့်ရင်တော့ ချယ်လ်ဆီးက ၂၀၁၂ ပြိုင်ပွဲမှာ ဒုတိယ၊ ၂၀၂၁ ပြိုင်ပွဲမှာ ချန်ပီယံဆုတစ်ကြိမ် ရရှိဖူးပြီး PSG အသင်းကတော့ ဒီနှစ်မှ ပထမဆုံးအကြိမ် ယှဉ်ပြိုင်ခွင့်ရတာဖြစ်ပေမဲ့ ချန်ပီယံခြေစွမ်းနဲ့အတူ ဗိုလ်လုပွဲအထိ တက်ရောက်နိုင်ခဲ့တယ်။ PSG အသင်းက ဒီပြိုင်ပွဲတစ်လျှောက် (၆)ပွဲကစားရာမှာ (၅)ပွဲနိုင်၊ တစ်ပွဲရှုံးနိမ့်ထားပြီး အနိုင်ရတဲ့ (၅)ပွဲစလုံး Clean Sheet ရခဲ့ပါတယ်။ ဒါ့အပြင် PSG အသင်း အနိုင်ယူထားတဲ့ပြိုင်ဘက်တွေထဲမှာ အက်သလက်တီကို၊ ဘိုင်ယန်မြူးနစ်၊ ရီးယဲလ်မက်ဒရစ်တို့လို ထိပ်တန်းအသင်းတွေ ပါဝင်ခဲ့ပြီး ခြေပြတ်၊ ဂိုးပြတ်အနိုင်ရခဲ့တာ အထင်ကြီးလောက်စရာပါ။ ချယ်လ်ဆီးအသင်းကလည်း (၆)ပွဲမှာ (၅)ပွဲနိုင်၊ တစ်ပွဲရှုံးခဲ့ပြီး တစ်ပွဲထက်တစ်ပွဲ စွမ်းဆောင်ရည်ကောင်းပြသလာနိုင်ပါတယ်။ တစ်ဦးချင်းနဲ့ အသင်းလိုက်စွမ်းဆောင်ရည်ကိုကြည့်ရင် PSG အသင်းက ပိုသာပါတယ်။ နှစ်သင်းထိပ်တိုက်တွေ့ဆုံမှုကို ကြည့်ရင်လည်း PSG အသင်းက နောက်ဆုံးနှစ်ပွဲဆက် အနိုင်ရထားသလို၊ (၄)ပွဲဆက် ရှုံးပွဲမရှိကစားထားနိုင်ပါတယ်။ PSG အသင်း ချန်ပီယံဖလား ကိုင်မြှောက်မယ့်ပွဲပါ။ နှစ်ဂိုးလောက် ပြတ်နိုင်တယ်။
