ဘာစီလိုနာကြယ်ပွင့်တိုက်စစ်ကစားသမား လာမင်းယမားလ်က လာလီဂါတစ်လတာအကောင်းဆုံးကစားသမားဆုကို နှစ်လဆက် ဆွတ်ခူးခဲ့ပါတယ်။
ယမားလ်ဟာ နိုဝင်ဘာလနဲ့ ဒီဇင်ဘာလ နှစ်လဆက် ရရှိခဲ့တာဖြစ်ပြီး ၂၀၂၄ စက်တင်ဘာလကလည်း ရရှိခဲ့ဖူးလို့ တတိယအကြိမ်မြောက် ဖြစ်ခဲ့တယ်။
၂၀၁၃-၁၄ ရာသီက စတင်ချီးမြှင့်ခဲ့တဲ့ လာလီဂါတစ်တာအကောင်းဆုံးဆုသမိုင်းမှာ ယမားလ်က ဘယ်လင်ဂမ်၊ ဗင်နီစီယပ်၊ လီဝန်ဒေါစကီး၊ အမ်ဘာပေ၊ စီရော်နယ်လ်ဒိုတို့နဲ့အတူ သုံးကြိမ်စီနဲ့ စတုတ္ထအများဆုံးအဖြစ် ရပ်တည်ခဲ့ပါတယ်။
၎င်းဟာ ဒီဇင်ဘာလ အကောင်းဆုံးဆုအတွက် ရီးရဲလ်အသင်းက အမ်ဘာပေအပါအဝင် ကိုကေ(အက်သလက်တီကို)၊ ရာဒူ(ဆယ်လ်တာဗီဂို)နဲ့ ဗယ်လာရာ(အယ်လ်ချီ)တို့ကို ကျော်ဖြတ်ရရှိခဲ့တာပါ။
ယမားလ်အနေနဲ့ ဒီဇင်ဘာလအတွင်း လာလီဂါလေးပွဲမှာ ပွဲချိန် ၃၆၀ မိနစ်အနက် ၃၅၈ မိနစ် ကစားခဲ့ပြီး နှစ်ဂိုးသွင်းကာ အောင်မြင်တဲ့ဖြတ်ကျော်နိုင်မှု ၂၇ ကြိမ်နဲ့ တစ်ပွဲပျမ်းမျှ ခြောက်ကြိမ်ကျော် ရှိခဲ့ပါတယ်။
၎င်းဟာ လာလီဂါယူ-၂၃ အကောင်းဆုံးကစားသမားဆုကိုလည်း သုံးကြိမ်တိုင် ဆွတ်ခူးရရှိခဲ့ဖူးပါတယ်။
