ရီးယဲလ်အသင်းရဲ့ ဘရာဇီးလ်တိုက်စစ်ကစားသမား ဗင်နီစီယပ်စ်ဟာ ဘာစီလိုနာအသင်းနဲ့ ယှဥ်ပြိုင်ကစားခဲ့တဲ့ El Clasico ပွဲမှာ လူစားလဲခံရချိန် ဒေါသပေါက်ကွဲခဲ့တဲ့ အပြုအမူအတွက် လူမှုကွန်ရက်ကတစ်ဆင့် ပြန်လည်တောင်းပန်ခဲ့ကြောင်း သိရပါတယ်။
“Clasico ပွဲမှာ လူစားလဲခံရချိန် ကျွန်တော့်ရဲ့ တုံ့ပြန်ခဲ့ပုံအတွက် ဒီနေ့ မက်ဒရစ်ပရိသတ်တွေကို တောင်းပန်ချင်ပါတယ်။ ဒီနေ့ လေ့ကျင့်ရေးအစီအစဥ်မှာ လုပ်ခဲ့သလို အသင်းဖော်တွေ၊ ကလပ်အသင်းနဲ့ ဥက္ကဋ္ဌကိုလည်း ထပ်ပြီးတောင်းပန်ချင်ပါတယ်။ တစ်ခါတစ်ရံ စိတ်အားထက်သန်မှုက ကျွန်တော့်ကို ပိုကောင်းစေပါတယ်။ ဘာကြောင့်လဲဆိုတော့ ကျွန်တော်က အမြဲအနိုင်ရချင်ပြီး အသင်းကို ကူညီချင်တာကြောင့်ပါ။ ကျွန်တော့်ရဲ့ ပြိုင်ဆိုင်လိုတဲ့ စရိုက်လက္ခဏာက ဒီအသင်းအပေါ် ချစ်ခြင်းကနေ ဖြစ်တည်လာတာပါ။ ပထမဆုံးနေ့ကလိုပဲ ရီးယဲလ်မက်ဒရစ်အသင်း ကောင်းဖို့အတွက် စက္ကန့်တိုင်း တိုက်ပွဲဝင်သွားမယ်လို့ ကတိပေးပါတယ်” လို့ ဗင်နီစီယပ်စ်က ရေးသားခဲ့ပါတယ်။
မီဒီယာတချို့ကတော့ ဗင်နီစီယပ်စ် တောင်းပန်ခဲ့တဲ့အထဲမှာ နည်းပြ အလွန်ဆို ပါဝင်ခြင်းမရှိတာကြောင့် သူတို့ရဲ့ ဆက်ဆံရေးကို စောင့်ကြည့်ရဖွယ်ရှိကြောင်း သုံးသပ်ဖော်ပြခဲ့ပါတယ်။
ဒါပေမဲ့ ဗင်နီစီယပ်စ်ဟာ အလွန်ဆိုနဲ့ နည်းပြအဖွဲ့ကို အပြင်မှာ သီးသန့်တောင်းပန်ခဲ့ကြောင်း သိရပါတယ်။
