အာဆင်နယ်အသင်းရဲ့ အကယ်ဒမီကစားသမားဟောင်း ဘီလီဗီဂါ ဦးနှောက်ဒဏ်ရာရရှိပြီး ကွယ်လွန်
အာဆင်နယ်အသင်းရဲ့ အကယ်ဒမီကစားသမားဟောင်းတစ်ဦးဖြစ်တဲ့ ဘီလီဗီဂါဟာ ဘောလုံးပွဲ ယှဉ်ပြိုင်ကစားစဉ် ဦးခေါင်းထိခိုက်မိပြီး ဦးနှောက်ဒဏ်ရာရရှိကာ ကွယ်လွန်သွားခဲ့ကြောင်း သိရပါတယ်။
ဘီလီဗီဂါဟာ အသက်(၁၄)နှစ်အရွယ်မှာ အာဆင်နယ်အကယ်ဒမီကို စတင်ရောက်ရှိလာတဲ့ အင်္ဂလန်တိုက်စစ်မှူးဖြစ်ပြီး အသင်းနဲ့ ပရော်ဖက်ရှင်နယ်စာချုပ် ချုပ်ဆိုနိုင်ခဲ့ပေမဲ့ အသင်းကြီးအတွက် ကစားခွင့်မရခဲ့ဘဲ ၂၀၂၃-၂၄ ရာသီကုန်မှာ အာဆင်နယ်အသင်းနဲ့ လမ်းခွဲသွားခဲ့တာပါ။
ဘီလီဗီဂါဟာ ပြီးခဲ့တဲ့လက ချီချက်စတာစီးတီးအသင်းကို ပြောင်းရွှေ့ခဲ့ပြီး ပြီးခဲ့တဲ့ စနေနေ့က Wingate and Finchley အသင်းနဲ့ အင်္ဂလန်သတ္တမတန်းအဆင့်ပွဲစဉ် ယှဉ်ပြိုင်ကစားစဉ် ကွန်ကရစ်နံရံနဲ့ တိုက်မိပြီး ဦးခေါင်းမှာ ဒဏ်ရာရရှိခဲ့ပါတယ်။
အင်္ဂါနေ့မှာ ခွဲစိတ်ကုသမှု ခံယူခဲ့ပေမဲ့ ကြာသပတေးနေ့ နံနက်ပိုင်းမှာ ဆုံးပါးသွားခဲ့တာဖြစ်ပြီး ကွယ်လွန်ချိန်မှာ အသက်(၂၁)နှစ်သာရှိသေးကြောင်း သိရပါတယ်။
ဘီလီဗီဂါ ကွယ်လွန်ခဲ့ခြင်းအတွက် လက်ရှိအသင်းအပြင် အာဆင်နယ်အသင်းကရော အငှားသွားကစားခဲ့ဖူးတဲ့ ဒါဘီအသင်းကပါ ဝမ်းနည်းကြေကွဲကြောင်း ကြေညာချက်တွေ ထုတ်ပြန်ခဲ့ပါတယ်။
