လီဗာပူးလ်အသင်းရဲ့နည်းပြ အာနယ်ဆလော့က နွေရာသီမှာ ကစားသမားသစ်များစွာ ခေါ်ယူအားဖြည့်ထားပြီးဖြစ်ပေမဲ့ တိုက်စစ်မှူးနောက်တစ်ဦး အနည်းဆုံးလိုအပ်တယ်လို့ သုံးသပ်ပြောကြားခဲ့ပါတယ်။
လီဗာပူးလ်အသင်းဟာ ဒီနှစ် နွေရာသီမှာ ကစားသမားသစ်(၈)ဦး ခေါ်ယူထားပြီး ကနဦးပြောင်းရွှေ့ကြေးတင်ပဲ ပေါင်(၂၆၅)သန်း အသုံးပြုထားပါတယ်။
ဒါပေမဲ့ အဲဒီကစားသမားသစ်တွေထဲမှာ တိုက်စစ်မှူးက ပြင်သစ်ကစားသမား အီကီတိုက်နဲ့ အင်္ဂလန်ဆယ်ကျော်သက် ဝီလ်ရိုက်တို့ပဲ ပါဝင်ပါတယ်။
လီဗာပူးလ်အသင်းက နယူးကာဆယ်တိုက်စစ်မှူး အီဆက်ခ်ကို ခေါ်ယူဖို့ ကြိုးစားနေပမဲ့ မအောင်မြင်သေးသလို၊ ဥရုဂွေးတိုက်စစ်မှူး ဒါဝင်နူးနက်ဇ်ကိုလည်း ရောင်းထုတ်ထားပါတယ်။
ဒါကြောင့် အသင်းရဲ့တိုက်စစ်ပိုင်းအပေါ် မေးမြန်းခဲ့ရာမှာ အာနယ်ဆလော့က ”ဟူဂို(အီကီတိုက်)ကို No.9 ကစားသမားအဖြစ် ကျွန်တော် အဓိကသိထားပါတယ်။ သူက ဘယ်တောင်ပံ ဒါမှမဟုတ် တခြား No.9 တစ်ယောက်နဲ့လည်း တွဲကစားနိုင်ပါတယ်။ ကျွန်တော်တို့ အနည်းဆုံး တိုက်စစ်မှူးနောက်တစ်ယောက် လိုအပ်ပါတယ်” လို့ ပြောကြားခဲ့ပါတယ်။
