ဂျေးဇူးကို ယူရိုသန်း ၃၀ နဲ့ ရောင်းထုတ်ဖို့ အာဆင်နယ်အသင်း စီစဥ်နေ
အာဆင်နယ်အသင်းဟာ ဒဏ်ရာက ပြန်ကောင်းလာပြီဖြစ်တဲ့ ဘရာဇီးလ်တိုက်စစ်မှူး ဂျေးဇူးကို ယူရိုသန်း ၃၀ နဲ့ ရောင်းထုတ်ဖို့ စီစဥ်နေကြောင်း သိရပါတယ်။
၂၀၂၂ နွေရာသီမှာ မန်စီးတီးကနေ အာဆင်နယ်ကို ပေါင် ၄၅ သန်းနဲ့ ပြောင်းရွှေ့ခဲ့တဲ့ ဂျေးဇူးဟာ ၂၀၂၇ ခုနှစ်အထိ စာချုပ်သက်တမ်းရှိနေတာကြောင့် အာဆင်နယ်အသင်းက လာမယ့်ဇန်နဝါရီစျေးကွက်မှာ ယူရိုသန်း ၃၀ နဲ့ ရောင်းထုတ်ဖို့ စီစဥ်နေတာပါ။
အသက် ၂၈ နှစ်ရှိပြီဖြစ်တဲ့ ဂျေးဇူးဟာ ပြီးခဲ့တဲ့ ဇန်နဝါရီမှာ ဒူးအရွတ်ဒဏ်ရာရရှိတာကြောင့် ကာလရှည်အနားယူနေရပေမဲ့ လက်ရှိအချိန်မှာ ဒဏ်ရာပျောက်ကင်းသွားပြီဖြစ်တာကြောင့် လာမယ့် ဒီဇင်ဘာမှာ ပြန်ကစားနိုင်ဖွယ်ရှိနေပါတယ်။
ဂျေးဇူးက အာဆင်နယ်အသင်းမှာ ဆက်ကစားဖို့ ဆန္ဒရှိနေပေမဲ့ အာဆင်နယ်အသင်းက နေရာပေးလိုခြင်းမရှိတော့ဘဲ အပြီးသတ်ခေါ်ယူမယ့်အသင်းမရှိရင်တောင် အငှားချသွားမယ်လို့ သိရပါတယ်။
ဂျေးဇူးကလည်း အာဆင်နယ်မှာ ရရှိနေတဲ့ လစာနှုန်းထားအတိုင်း တစ်ပတ်ပေါင် ၂၆၅၀၀၀ ရရှိရင် အသင်းပြောင်းရွှေ့ကစားဖို့ လက်ခံသွားမယ်လို့ သိရပါတယ်။
လက်ရှိအချိန်မှာ ဂျေးဇူးကို ခေါ်ယူဖို့ ဘုန်းမောက်၊ ဖူလ်ဟမ်၊ ဝက်စ်ဟမ်း၊ အေစီမီလန်နဲ့ ဂျူဗင်တပ်စ်တို့က စိတ်ဝင်စားနေကြောင်း သိရပါတယ်။
