ခရစ္စတယ်ပဲလေ့စ်အသင်းဟာ ယူရိုပါလိဂ်ယှဉ်ပြိုင်ခွင့်ရရှိဖို့အတွက် အားကစားခုံရုံး(CAS)ထံ အယူခံတင်သွင်းခဲ့ရာမှာ ရှုံးနိမ့်ခဲ့တာကြောင့် ကွန်းဖရန့်လိဂ်သာ ယှဉ်ပြိုင်ခွင့်ရရှိတော့မှာဖြစ်ကြောင်း သိရပါတယ်။
ခရစ္စတယ်ပဲလေ့စ်အသင်းဟာ ပြီးခဲ့တဲ့ရာသီမှာ FA ဖလား ချန်ပီယံဆုရရှိခဲ့တာကြောင့် ယူရိုပါလိဂ်ယှဉ်ပြိုင်ခွင့်ရရှိမှာဖြစ်ပေမဲ့ ပြင်သစ်ကလပ် လိုင်ယွန်အသင်းနဲ့ ပိုင်ရှင်တူဖြစ်နေလို့ UEFA ရဲ့စည်းမျဉ်းအရ လိုင်ယွန်အသင်းသာ ယူရိုပါလိဂ်ယှဉ်ပြိုင်ခွင့်ရပြီး ပဲလေ့စ်အသင်းက ကွန်းဖရန့်လိဂ်ကို ဆင်းသက်ယှဉ်ပြိုင်ခဲ့ရတာပါ။
လိုင်ယွန်နဲ့ ပဲလေ့စ်နှစ်သင်းစလုံးကို ပိုင်ဆိုင်ထားတဲ့ အမေရိကန်လုပ်ငန်းရှင် ဂျွန်တက်စ်တာက ပြီးခဲ့တဲ့ဇွန်လမှာ ပဲလေ့စ်အသင်းရဲ့ ရှယ်ယာ(၄၃%)ကို ပြန်ရောင်းထုတ်ခဲ့ပေမဲ့ သတ်မှတ်ရက်ထက် နောက်ကျသွားခဲ့တာကြောင့် အယူခံမအောင်မြင်ခဲ့ခြင်းဖြစ်ကြောင်းလည်း သိရပါတယ်။
ဒါကြောင့် ပဲလေ့စ်အသင်းအနေနဲ့ ကွန်းဖရန့်လိဂ် Play-off အဆင့်မှာ ယှဉ်ပြိုင်ကစားရမှာဖြစ်ပြီး ပြီးခဲ့တဲ့ရာသီမှာ အဆင့်(၇)နေရာရခဲ့တဲ့ နော်တင်ဟမ်ဖောရက်စ်အသင်းက ယူရိုပါလိဂ် လိဂ်အဆင့်မှာ ယှဉ်ပြိုင်ကစားသွားရမှာဖြစ်ပါတယ်။
ပရိသတ်တချို့ကတော့ ပဲလေ့စ်အသင်း ကွန်းဖရန့်လိဂ်မှာ ချန်ပီယံဆုရရှိဖို့ ဆန္ဒပြုကြောင်း လူမှုကွန်ရက်မှာ ရေးသားခဲ့ကြပါတယ်။
