အာဆင်နယ်အသင်းဟာ ရီးယဲလ်မက်ဒရစ်အသင်းက ဘရာဇီးလ်တောင်ပံ ကစားသမား ရိုဒရီဂိုကို အငှားနဲ့ခေါ်ယူဖို့ ဆန္ဒရှိနေကြောင်း သိရပါတယ်။
ရိုဒရီဂို(၂၄ နှစ်)ဟာ နွေရာသီအပြောင်းအရွှေ့ကာလတစ်လျှောက် ရီးယဲလ်အသင်းက ထွက်ခွာတော့မယ်လို့ ထင်ကြေးပေးခံနေရသူဖြစ်ပြီး အိုဆာဆူနာနဲ့ ယှဉ်ပြိုင်ခဲ့တဲ့ လာလီဂါအဖွင့်ပွဲစဉ်မှာ ချန်လှပ်ခံခဲ့ရတာကြောင့် ပိုပြီးလူပြောများလာခဲ့ပါတယ်။
ရိုဒရီဂိုကို ချန်လှပ်ခဲ့ခြင်းအတွက် မေးမြန်းမှုကိုတော့ နည်းပြ ရှာဘီအလွန်ဆိုက ”ဘာမှမဖြစ်ပါဘူး။ ကျွန်တော် ရိုဒရီဂိုကို အားကိုးပါတယ်။ ဒါဟာ ပွဲတစ်ပွဲပါပဲ။ ကျွန်တော့်ဆုံးဖြတ်ချက်သက်သက်ပါပဲ” လို့ ပြောကြားခဲ့ပါတယ်။
ဒါပေမဲ့ ရိုဒရီဂိုအနေနဲ့ အသင်းမပြောင်းရွှေ့ခဲ့ရင် နည်းပြ အလွန်ဆိုရဲ့ လက်အောက်မှာ ပွဲကစားခွင့်တွေ လျော့ကျဖွယ်ရှိကြောင်း မှန်းဆချက်တွေကတော့ ပိုပြီးမြင့်တက်လာခဲ့ပါတယ်။
ဘယ်တောင်ပံကို အားဖြည့်ချင်နေတဲ့ အာဆင်နယ်အသင်းက ရိုဒရီဂိုကို ခေါ်ယူဖို့ စိတ်ဝင်စားနေပေမဲ့ ရီးယဲလ်အသင်းက ပြောင်းရွှေ့ကြေးယူရို(၁၀၀) အလိုရှိနေတာကြောင့် အာဆင်နယ်အသင်းအနေနဲ့ အငှားနဲ့ခေါ်ယူဖို့ ဆန္ဒရှိနေခြင်းဖြစ်ကြောင်း သိရပါတယ်။
