ဆောက်သမ်တန်အသင်းဟာ ပြိုင်ဘက်အသင်းတွေရဲ့ လေ့ကျင့်မှုကို သူလျှိုပြုလုပ်ခဲ့မှုကြောင့် Play-offs ဗိုလ်လုပွဲက ထုတ်ပယ်ခံခဲ့ရပြီး လာမယ့်ရာသီ လိဂ်ချန်ပီယံရှစ်ပြိုင်ပွဲမှာလည်း (၄)မှတ်လျှော့ပြစ်ဒဏ်နဲ့ ယှဉ်ပြိုင်သွားရမှာဖြစ်ကြောင်း သိရပါတယ်။
ဆောက်သမ်တန်အသင်းဟာ ၂၀၂၅-၂၆ ရာသီ လိဂ်ချန်ပီယံရှစ်ပြိုင်ပွဲမှာ အဆင့်(၄)နေရာရရှိခဲ့တာကြောင့် ပရီးမီးယားလိဂ်တန်းတက်ခွင့်အတွက် Play-offs ယှဉ်ပြိုင်ခွင့်ရရှိခဲ့ပြီး ဆီမီးဖိုင်နယ်မှာ မစ်ဒယ်ဘရော့အသင်းကို နှစ်ကျော့ပေါင်း(၂-၁)ဂိုးနဲ့ အနိုင်ယူကျော်ဖြတ်ကာ Play-offs ဗိုလ်လုပွဲ တက်ရောက်နိုင်ခဲ့ပါတယ်။
Play-offs ဗိုလ်လုပွဲမှာ ဟားလ်စီးတီးနဲ့ ယှဉ်ပြိုင်ရမှာဖြစ်ပြီး ပရီးမီးယားလိဂ်ကို တန်းပြန်တက်ခွင့်ရဖို့ အလားအလာကောင်းခဲ့ပေမဲ့ သူလျှိုအမှု ပေါ်ပေါက်လာခဲ့တာပါ။
မစ်ဒယ်ဘရော့အသင်းက သူတို့ရဲ့ လေ့ကျင့်မှုကို သူလျှိုလုပ်ခဲ့ကြောင်း တိုင်ကြားခဲ့တာကြောင့် အင်္ဂလိပ်ဘောလုံးလိဂ်က စုံစမ်းစစ်ဆေးမှု ပြုလုပ်ခဲ့ရာမှာ ဆောက်သမ်တန်အသင်းက အောက်စ်ဖို့ဒ်နဲ့ပွဲ၊ အစ်ဝစ်ချ်နဲ့ပွဲတွေမှာပါ သူလျှိုလုပ်ခဲ့ကြောင်း တွေ့ရှိခဲ့တာကြောင့် အခုလို အရေးယူအပြစ်ပေးခဲ့ခြင်းဖြစ်ကြောင်း သိရပါတယ်။
ဒါကြောင့် လိဂ်ချန်ပီယံရှစ် Play-offs ဗိုလ်လုပွဲမှာ ဆောက်သမ်တန်နေရာ မစ်ဒယ်ဘရော့အသင်း အစားထိုးယှဉ်ပြိုင်ရမှာဖြစ်ပြီး ဝင်ဘလေကွင်းမှာ ဟားလ်စီးတီးအသင်းနဲ့ မေ(၂၃) ရက်နေ့ ကစားရမှာဖြစ်ကြောင်း သိရပါတယ်။
ဆောက်သမ်တန်အသင်းက အယူခံဝင်ထားပြီး အဲဒီအယူခံအတွက် ဒီနေ့ ဆုံးဖြတ်ချက်ချမှတ်မယ်လို့လည်း သိရပါတယ်။
